Николовски во Ротимље: Се остварува визијата на Трајковски за мир и единство, членството во НАТО и евроинтеграција
Делегација на Владата составена од вицепремиерот за борба со корупцијата и криминал, одржлив развој и човечки ресурси Љупчо Николовски и министерката за труд и социјална политика, Јагода Шахпаска, денеска присуствуваа во Ротимље, БиХ на одбележувањето на 17-годишнината од смртта на претседателот Борис Трајковски, членовите на неговиот кабинет и на екипажот на авионот, кои на тоа место трагично ги загубија животите на овој ден во 2004 година, соопшти владината прес-служба.
– Секогаш ќе го паметиме како човек кој имаше визија за успешна Македонија, како човек кој беше умерен реформатор и миротворец. Секогаш ќе остане запаметен и по неговата клучна улога како предводник на дијалогот за мирно решавање на конфликтот во 2001 година, со кој се стави крај на оружените дејствија и се спречи тенденцијата за граѓанска војна во државата. Со голема умереност во етничкиот дијалог, расправајќи за поголема вклученост на етничките Албанци, претседателот Трајковски одигра клучна улога во решавањето на конфликтот, како и во процесот на помирување и склучувањето на Охридскиот рамковен договор, истакна Николовски на положувањето цвеќе на спомен-обележјето во Ротимље.
Додаде дека лидерските вредности на Трајковски беа од исклучителна важност во еден тежок период во кој се наоѓаше нашата држава и дека денес се остварува неговата визија за европска интеграција, за членство во НАТО, за грижа за граѓаните, единство, мир и стабилност.
– Ги исполнуваме неговите ветувања за стратешките цели на државата. Соединетите Американски Држави се наш стратешки партнер и сојузник. Северна Македонија стана 30-та земја членка на НАТО. Го трасиравме патот и на чекор сме до влез во Европската Унија. Нашата држава е пример во регионот за единство, соживот и мир. И денеска овде во Мостар, на спомен-обележјето, ги продолжуваме неговите заложби и го потврдуваме големото пријателство помеѓу Северна Македонија и Босна и Херцеговина и ја испраќаме пораката за меѓусебна соработка, меѓуетничка толеранција, за мир спокојство и стабилност, рече вицепремиерот Николовски.