Николовски: Промена на Устав или брзи реформи и членство во ЕУ за промена на Договорот од Преспа
„Ние гласавме за НАТО и сме силни поддржувачи. Тоа е фундамент на нашето постоење уште пред нашето формирање. Сите бевме свесни дека договор со Грција е потребен. Не затоа што сакаме, туку затоа што тоа беше реалноста“, изјави Александар Николовски, потпретседател на ВМРО-ДПМНЕ за Утрински брифинг на „Слободна ТВ“.
Сепак, според него ваков договор е апсолутно најлошиот што Македонија можеше да го добие.
„Наше полно право како политичари е да се бориме за она што е подобро. Ние кажавме кои се условите за тоа да го направиме“, вели Николовски.
Тој вели дека едната варијанта е со промена на Уставот, доколку добијат двотретинско мнозинство.
„Втората варијанта е да се седне на иста маса со Грција. Се знае како се седнува на иста маса – со брзи реформи и членство во ЕУ. Тие се двата начина на кои што можеме да се бориме. Во исто време никако не можеме да бидеме против нашите принципи – еден од фундаментите на партиите е западното сојузување“, изјави Александар Николовски, потпретседател на ВМРО-ДПМНЕ.