„Нашата заложба за градење на силни, независни и професионални јавни обвинителства – успева. Собранието со потребното мнозинство пратеници го усвои Законот за јавно обвинителство. Ставивме уште еден темел на неселективната правда и на правосудство кое гарантира одговорност и казнивост за секој којшто го прекршил законот“, соопшти генералниот секретар на СДСМ, Љупчо Николовски.

Тој им честиташе на пратениците кои го поддржаа Законот за ЈО и вели дека огромното мнозинство во Собранието покажа дека иднината на земјата е поважна од партиските тактики.

„Нема веќе простор за криминални структури и за политичари кои поддржуваат криминални интереси. Тие што се дрзнаа да го кочат напредокот на државата – изгубија! Извршителот Мицкоски и неговиот шеф Груевски се поразени од пратениците, од народот, од СДСМ и од сите политички и граѓански сили кои и мислат добро на сопствената земја“, рече Николовски.

Николовски ги повика граѓаните да се придружат на маршот „Чекориме за правда“ кој започнува денеска во 18 часот.

„Тргнуваме од Собранието – и завршуваме пред комплексот судови – таму ја упатуваме нашата порака. Следува прочистување на правосудството. Тоа имаме да порачаме и за тоа бараме поддршка, од вас од граѓаните! Ве повикувам сите праведољубиви граѓани, да ни се приклучите. Се гледаме во 18 часот пред Собранието, чекориме за правда.“, вели Николовски.