На пат во Косово се запалил автомобилот во кој бил началникот на армискиот Генералштаб Ѓурчиновски
Автомобилот во кој се возел началникот на армискиот Генералштаб, генерал-потполковник Васко Ѓурчиновски, вчера се запалил во возење на пат во Косово, информираа од Генералштабот.
Во соопштението се вели дека генералот Ѓурчиновски, кој учествуваше на 25-тата конференција на началници на генералштабови на армиите од земјите членки на Јадранската повелба, при враќање низ Косово, на автопатот меѓу Коморане и Приштина во доцните попладневни часови ненадејно избувнал оган кај моторот на автомобилот, но благодарение на брзата интервенција на возачот и обезбедувањето, огнот бил изгаснат за многу кратко време.
Генералот Ѓурчиновски, заедно со членовите на делегацијата и обезбедувањето, го продолжиле патувањето со останатите возила и се вратиле дома.
„Возилото веднаш по првиот знак на палење, безбедно е тргнато од сообраќај, а по гасењето, истото е транспортирано во Република Северна Македонија“, се наведува во соопштението на ГШ.