Независниот театар „Златен Елец“ премиерно ќе изведе претстава во режија на Ана Батева
Претставата „Шапка, чоколадо, анус и уште нешто“, поставена по текст од Ханох Левин, е огледало на малиот човек со сите негови стравови и инстинкти, болки, но и желба за живот во едно. Премиерната изведба на претставата со сценска верзија и режија на Ана Батева е на 24 јули во Младинскиот културен центар во Скопје.
Специјалист во тоа да ја провоцира и шокира публиката, Ханох Левин презентира безмилосна дисекција на основните вредности на нацијата и државата. Оваа црна комедија, преку различни скечови и апсурдни ситуации раскажува за парадоксот на денешното постоење.
Ликовите исправени на работ на егзистенцијата, свесно ги исмејуваат животните неправди и системскиот апсурд, и со достоинство се спротивставуваат на болката причинета од соочувањето со светот.
Како резултат од хаосот низ светот со неговите капиталистички вредности и консуматорство, ликовите ја губат генералната смисла и се оставаат на задоволството од малите работи што „живот значат“. Затоа претставата е панк-рок кабаре кое се бунтува против статусквото на апсурдните случувања околу нас и со песна му се насмевнува на животот.
Претставата „Шапка, чоколадо, анус и уште нешто“ е петта премиера на независниот театар „Златен Елец“ во неговото едногодишно постоење.
Во претставата играат Надица Петрова, Бобан Алексоски, Димитрина Мицкоска, Григор Јовановски, Миа Кантарџиева и Давид Илиќ. Преводот на текстот е на Иван Калошев и Ана Батева, музиката на Стефан Здравески, а дизајнот на Христо Христов.
Претставата е соработка на Театар „Златен Елец“ со „СПАМ Студиос“ од Бугарија. Финансирана е од Министерството за култура на РСМ.