Невил: Манчестер јунајтед нема да биде шампион, тоа е чудна екипа
Манчестер јунајтед изненадувачки загуби на домашен терен од Астон Вила со 1:0 во саботата во шестото коло од Премиер лигата и на тој начин не успеа да го преземе врвот на табелата.
Тимот на Оле Гунар Солскјер играше слабо, а Бруно Фернандеш промаши пенал во судиското надополнување. Експертите го критикуваа Јунајтед за играта, а на критиките им се придружи и легендарниот дефанзивец на тој клуб, Гери Невил.
– Јунајтед нема да биде шампион. Тоа го зборував и кога победуваа и кога Роналдо постигнуваше голови. Тие едноставно не играат доволно добро како тим, а тоа е клучот за освојување на оваа лига. Тимот мора да биде кохезивен и кога игра со топката и без неа. Играчите мора да имаат јасен план и стил на игра, а јас засега гледам само група на добри индивидуалци.
Има многу нови играчи како Роналдо, Санчо и Варан. Тие мора да се прилагодат, но и да се обидат да станат дел од тимот. Само во такви околности можете да победувате на натпревари дури и кога не играте добро. Чуден е тимот, за мене тие само на моменти се однесуваат како победнички тим. Погледнете ги Челси, Сити и Ливерпул. Тие се екипи во целосна смисла на зборот, кои постојано даваат сè од себе. Не велам дека Јунајтед не се труди, но Оле мора да започне од поединци за да го состави тимот – вели Невил.
Јунајтед победи само на еден во последните четири натпревари во сите натпреварувања, против Вест Хем во првенството со 2:1, кога Марк Нобл утна пенал за реми. Пред тоа, Јунајтед загуби од Јанг Бојс на отворањето на Лигата на шампионите, потоа од Вест Хем во Лига купот и сега од Астон Вила.