Неверојатно: Дури девет екипи летово одбиле да го ангажираат Роналдо
Кристијано Роналдо се обидува на секој начин да си замине од Манчестер јунајтед, но никако не може да најде клуб и дури девет екипи одбиле да го ангажираат Португалецот.
Италијанскиот новинар Танкреди Палмери денеска објави неверојатна вест, агентот на Португалецот Жорге Мендеш го понудил Роналдо на девет екипи и од сите нив добил корпа.
Последни екипи што се заблагодариле на понудата на Мендеш се последните два шампиони во Серија А, Милан и Интер.
Екипите на Барселона, Реал Мадрид, Баерн Минхен, Јувентус и ПСЖ веднаш го одбија Мендеш, а најсериозни беа шекулациите со Атлетико Мадрид.
Тренерот на Атлетико, Диего Симеоне беше сериозно загреан да го донесе Роналдо, но проблем претставуваше лошата финансиска ситуација каоко и отпорот на навивачите кои не сакаа поранешен фудбалер на Реал Мадрид да игра за нивниот тим. Исто така и Челси пројавуваше интерес на почетокот, но веднаш се откажа.
Единствен тим што е подготвен да го ангажира Роналдо е неговиот матичен тим, односно клубот во кој ја започна професионалната кариера, Спортинг Лисабон, но Португалецот сака барем уште две сезони да игра во врвен тим.
Роналдо нема намера да остане уште една сезона во Манчестер јунајтед бидејќи смета дека екипата нема квалитет да се бори за титулата во Премиер лигата, а доказ за тоа се поразите во првите две кола од Брајтон и Брентфорд.