Алдаир Сапало Амаро Нето (роден во Луанда, Ангола) е третото зимско засилување на фудбалскиот прволигаш Шкендија. Станува збор за 25-годишен фудбалер со португалски пасош.

25-годишниот фудбалер после зимскиот тест камп организиран од клубот во декември, потпиша договор на шест месеци со можност истиот да биде продолжен, а ќе зависат и неговите перформанси во текот на пролетниот дел.

Доаѓа од велшкиот шампионат каде што ги бранеше боите на Бангор Сити. Како јуниор на почетокот од неговата кариера, беше дел од португалските гиганти Спортинг и Брага, беше дел од Фатима, а четири години играше за екипата на Маритимо.

– Чест ми е што ќе играм за овој клуб. Верувам во позитивни нешта и затоа сакам да им се заблагодарам на челниците на Шкендија за довербата. Една недела бев на проба во екипата, играв и тренирав со млади играчи меѓу 18-20 години. Го сакам начинот на кој што игра тимот. Првиот ден кога дојдов во Македонија го гледав мечот против Вардар и видов дека имаме добра екипа. Мислам дека ова ќе биде вистински предизвик за мене – рече Нето за клупскиот сајт на Шкендија.

Претходно тетовските „црвено-црни“ ангажираа уште две зимски засилувања, Ардин Далку и Валон Ахмеди.