Нетфликс обвинет за промовирање на педофилија, режисерката прашува: Како да го решиме проблемот ако не го гледаме?
Откако половина милион луѓе потпишаа петиција за отстранување на плакатот за филмот „Mignonnes//Cuties“ (Мињончиња/Слатки девојчиња) бидејќи, како што наведоа, поттикнува педофилија, Нетфликс, во чија продукција е филмот, го повлече плакатот и јавно се извини:
„Многу ни е жал поради неприкладната содржина што ја користевме за промоција на филмот „Mignonnes//Cuties“. Тоа не е во ред, ниту адекватно го претставува ова француско остварување кое доби награда на фестивалот Санденс. Ја променивме сликата и описот на филмот“, соопштија од Нетфликс на Твитер.
Филмот зборува за 11-годишно девојче кое се придружува на танцова група, а според зборовите на режисерката Мајмуна Дукура, нејзината идеја била да укаже токму на проблемот на претераната сексуализација на девојчињата.
Најавата на филмот моментално предизвика гнев на заедницата на социјалните мрежи и за првите 24 часа по објавувањето на плакатот, 25.000 луѓе веќе ја потпишаа петицијата за веднаш да се повлече плакатот. Во петицијата се наведува дека најавата „го сексуализира 11-годишното девојче поради визуелно уживање на педофилите“.
Но режисерката на филмот вели дека токму во тоа е поентата на остварувањето.
„Оваа приказна треба да го расветли тоа како социјалните мрежи ги тераат девојчињата да ги имитираат сексуалните експресии што ги гледаат, и дека дури и не сфаќаат што е нивното вистинско значење ниту кои сѐ опасности демнат од тоа. Денес, колку што е посекси и колку што е повеќе објект, жената добива поголема популарност на социјалните мрежи. Кога имате 11 години, не го разбирате во целост овој механизам, но го имитирате бидејќи сметате дека таквиот механизам ќе ви донесе слични резултати. Мислам дека тоа е тема за која јавно треба да се зборува“, рече Дукура.
Погледнете го трејлерот за филмот.