Несторовски: Се надевам дека ќе добијам поголема шанса во иднина
Напаѓачот на македонската репрезентација, Илија Несторовски, беше клучен играч за Удинезе во победата од 2:3 на гости кај Торино. Несторовски го постигна победничкиот гол и покажа дека неправедно е запоставен од тренерот Лука Готи кој сезонава речиси и да не му дава шанса на македонскиот репрезентативец.
Македонецот се надева дека прикажаната игра против Торино ќе биде доволен поттик за тренерот Готи далеку посериозно да смета на него и тоа го изјави за клупската интернет страница.
– Ова е голема сатисфакција за мене и за екипата. Откако одигравме добро во првите 60 минути и постигнавме два гола, направивме глупави грешки во две минути по што бевме казнети. Сепак покажавме карактер и стигнавме до победата, што е голема работа за нас. Секогаш давам сѐ на тренинзите и се надевам дека во иднина ќе добијам поголема шанса. По победничкиот гол, логично е да очекувам повеќе да играм во иднина. Овој тим на Удинезе е квалитетен, многу посилен од претходните години, играме убав фудбал и им даваме на навивачите причина за уживање – изјави Несторовски.