Премиерата на новиот филм за Џејмс Бонд, „Нема време за умирање“, ќе биде кон крајот на септември и покрај гласините дека поради пандемијата ќе биде одложена по четврти пат.

Филмските студија „Универзал“ и „МГМ“ објавија  на службениот твитер-профил од Џејмс Бонд дека свечената премиера ќе биде во Лондон на 28 септември, два дена пред планираната кино-премиера. Во САД во дистрибуција  ќе биде на 8 октомври.

Премиерата на филмот требаше да биде во април минатата година, но оттогаш трипати е одложена поради затворањето на кино-салите поради  ковид-пандемијата и наметнатите протоколи.

Филмскиот серијал за Џејмс Бонд е меѓу најисплатливите франшизи во Холивуд. Снимањето на најновото продолжение чинеше околу 200 милиони долари, а ова е последниот филм во кој Даниел Крејг го толкува агентот 007.