Додека регионот се соочува со фрапантни нови случаи на заразени и починати од коронавирусот, во земјава ковид-мерките, особено на прославите по градоначалничките победи, како да не постојат. На социјалните мрежи се споделуваат фотографии од дискотеки и ноќни клубови во кои се слави за викендите и каде се собрани огромен број на луѓе. Се пее, се лумпува, маска не може да се забележи, а дистанцата е мисловна именка.

Државниот пазарен инспекторат очигледно не може да постигне да воспостави ред. Од донесувањето на мерките на 16 август до крајот на септември, овој орган утврдил неправилности само кај 8 објекти, од кои 5 во Скопје, еден во Гостивар и два во Тетово, за што се донесени решенија за привремена забрана за вршење на дејност и истите се затворени. Издадени се прекршочни платни налози за наплата на глоба во вкупен износ од 4.750 евра за одговорно лице, 13 илјади евра за правно лице и 500 евра за физички лица.

Од први октомври донесени се 15 решенија според Законот за заштита на населението од заразни болести. На 2 октомври затворен е објект во Гостивар, на 6 октомври издаден е платен налог од 750 евра. Во октомври имало 3.539 контроли од државниот пазарен инспекторат.

„Изминатиот период освен на угостителски објекти, се вршат контроли и на обложувалници, молови и други дејности опфатени со мерките на владата. Се вршат проверки на оранизирани прослави, свадби и слично. Тоа значи дека контролите и инспекциските надзори се вршат по сите основи наведени во протоколите и мерките вклучувајќи ги и сертификатите, постоење на редари и слично и решенијата кои се донесени и преземените мерки се и по тие основи” велат од ДПИ за Слободен печат.

Оттаму уверуваат дека работат по однапред утврден план и никогаш не запреле со работа, ниту кога имаше карантин за сите, ниту кога имаше други ограничувања.

„Се работи за празници, во викенди па и во периодот на изборите нашата работа е континуирана”, велат оттаму.

ВИДЕО: Стевчо Јакимовски со екипата славеше со хитот на „Куку леле“ во познат скопски локал