Нема да има клечење во Токио, забранети протестите на спортистите на Олимписките игри
На спортистите кои ќе учествуваат на претстојните Олимписки игри ќе им биде забрането да изразуваат било какви протести на победничкиот подиум или на спортските борилишта, објави Меѓународниот Олимписки комитет (ИОК).
Повеќе од две третини од анкетираните спортисти (во анкетата учествуваа 3.547 спортисти) сметаат дека не е „прикладно да се демонстрира или да се изрази својот став“ на победничкиот подиум, на теренот или на службените свечености, додава ИОК.
Оваа препорака го следи правилото на Олимписката повелба која забранува било каква „политичка, верска или расна манифестација или пропаганда“ на олимписките натпреварувања.
Постапките као тие на американските атлетичари Џон Карлос и Томи Смит кои на ИО во Мексико 1968 година, ги кренаа рацете како поддршка на движењето „Црна сила“, може да бидат казнети.
„Голем дел од спортистите кои учествуваа во анкетата не мислат дека и прикладно да се изразуваат лични ставови за време на свечените церемонии на отворањето и затворањето на Игрите, на победничкиот подиум или на спортските терени“, соопшти ОИК кој дополни дека сепак ќе биде дозволен одреден вид на протест или искажување на своите ставови.
„Учесниците во анкетата сметаат дека е прикладно спортистите своите мислења да ги искажуваат во медиумите, на прес-конферециите и во мешовитите подрачја“, додава ИОК.
Меѓу останатите препораки кои ги усвои Извршниот одбор на ИОК, олимписката заклетва ќе биде прилагодена така што ќе ветува кохезија и недискриминација, а опремата на спортистите ќе биде одбележана со зборовите како што се „мир, солидарност и еднаквост“.
Оваа одлука на ИОК може да предизвика револт кај одредени спортисти и олимпски комитети. Имено, Олимпискиот и Параолимпискиот комитет на САД кон крајот на март објави дека спортистите кои ќе учествуваат на Игрите во Токио ќе може слободно да ги кренат рацете во воздух или да клекнат при интонирање на националната химна како поддршка во борбата за расна еднаквост и правда.