Неколку начини како да ги смирите симптомите на алергии на полен
Поленот на дрвјата кој е присутен од февруари до мај, на тревата од мај до јули и на тревните растенија од јули до октомври е присутен повеќе од половина година. Но, вие сигурно не сте алергични на сите видови полен.
Поленската алергија наликува на најобична кивавица, но ако симптомите како затнат нос, течење на носот и кивање потраат и се јавуваат секогаш во ист период во годината или во истоветни околности, проследени со чешање во носот и очите, понекогаш и солзење на очите, станува збор за алергиски кивавици и алергиски конјунктивит, објаснуваат алерголозите.
Алергиите најчесто се предизвикани од поленот на леска, топола, врба, бел јасен и бреза. Ваквата реакција на организмот по правило не е опасна, но е многу непријатна и неповолно влијае на квалитетот на животот. Алергиите се опасни само ако прераснат во алергиска астма. Бројот на лицата што страдаат од алергии е во постојан пораст, а 70 отсто од пациентите што навреме не го лекуваат алергиското воспаление, завршуваат со астма.
Алергиите се состојби во кои постои интензивирана реактивност на имунолошкиот систем, поради што може да се јави нарушување на кожата, на видливите слузокожи, цревната слузокожа или на слузокожата на дишните патишта. Сите овие појави можат да бидат многу благи, но и драматични, како што е, на пример, состојбата на анафилактичен шок, кој често доведува до смртен исход, објаснуваат пулмолозите.
Поленот на дрвјата (од февруари до мај), на тревата (од мај до јули) и на тревните растенија (од јули до октомври) е присутен повеќе од половина година. Но, вие сигурно не сте алергични на сите видови полен. Затоа е важно да ги направите сите тестови за да ги идентификувате алергените што ве измачуваат.
Кога концентрацијата на поленот на кој сте алергични е зголемена во воздухот, лекарите не препорачуваат проветрување на собите. Исто така, долната облека, односно целата облеката не треба да ја сушите надвор. Доколку можете, вградете филтри за заштита од полен во спалната соба и вградете специјални филтри во автомобилот. Носете очила за сонце што го намалуваат контактот на алергените со очите. Доколку носите контактни сочива, не би било лошо малку да се одморите од нив додека трае сезоната на полен. Преслекувајте се по секоја прошетка и измијте ја косата пред спиење за да го отстраните сиот полен што сте го донеле со себеси. Редовно мијте ги рацете и не ги фаќајте очите кога ќе почувствувате чешање. Носот можете да го плакнете со физиолошки раствор. Избегнувајте никотин, зачадени простории и базени со хлорирана вода, бидејќи тие само можат да ги влошат веќе постојните симптоми.
Кога концентрацијата на алергенот е висока, на пациентите им се препорачува да земаат лекови што ќе ги намалат или ќе ги спречат алергиските реакции на организмот. Лековите не ја лекуваат самата болест, туку само нејзините манифестации што настануваат во контакт со алергенот, поточно, доведуваат само до подобрување на моментната состојба. Лек за потполно излекување на алергиите не постои во класичната медицина.
Алергиите вообичаено се лекуваат со антихистамини, кортикостероиди и деконгестиви. Ваква терапија во форма на капки, спрејови и пумпи се дава за очите, носот, за белите дробови. Терапијата е симптоматска и се дава кога ќе се појават симптомите. Кога ваквите лекови нема да го смират воспалението и нема да ја подобрат здравствената состојба, се вклучуваат и вакцини. Тие не само што ги намалуваат симптомите туку имаат способност да го исправат дефектот на имунолошкиот систем, објаснуваат пулмолозите.
Зајакнете го имунитетот
Сите производи со кои се зајакнува имунолошкиот систем можат да им помогнат на луѓето што се алергични. Препорачливо е да се зема калциум, витамин Ц и цинк. Калциумот ја регулира пропустливоста на крвните садови и на тој начин ги намалува алергиските реакции. Треба да изберете препарати што содржат калциум и витамин Д, кој служи за подобро искористување на калциумот во телото. Витаминот Ц го намалува нивото на хистамин, а тоа е корисно во ублажувањето на алергиските реакции. Цинкот го зајакнува имунолошкиот систем и помага да се избегнат алергиските реакции.
Вкрстени алергии
Лицата што страдаат од алергија на полен по извесно време можат да развијат и алергиски реакции на одредени продукти. Ваквата вкрстена алергија настанува поради сличноста на поленот и одредени белковини на соодветниот продукт на кои организмот, природно, одговара со алергиска реакција. На пример, кај лицата алергични на полен од бреза, подоцна може да се јави алергија на лешник, а придружни симптоми се чешање, вкочанетост и боцкање во усната празнина.