Во текот на вчерашниот ден главна фудбалска вест беше дека Килијан Мбапе им соопштил на челниците на ПСЖ дека ова лето сака да го напушти клубот и да се пресели во Реал Мадрид.
Наводно, ПСЖ се обидел да го предомисли Мбапе нудејќи му 25 милиони евра нето годишна плата и договор до 2026 година, но одличниот напаѓач три пати ја одбил понудата бидејќи не сака да се „заклучи“ со новиот договор и да чека нови пет години за да си го исполни сонот, да заигра за Реал Мадрид.

Челниците на францускиот тим, се уште неопоравени од вчерашниот шок, денеска добија ново непријатно изненадување и тоа од Нејмар.
Бразилецот и дефинитивно ги замзрнал преговорите за нов договор бидејќи сака да се врати во Барселона.

Нејмар во 2017 година за рекордни 222 милиони евра токму од Барселона се пресели во ПСЖ, но сега и дефинитивно сака да се врати назад на „Камп Ноу“. Нејмар се надеваше дека Меси на лето ќе одлучи да ја напушти Барселона и ќе му се придружи во Париз, но со доаѓањето на Жоан Лапорта за претседател на Барселона, повеќе од извесно е дека Аргентинецот на лето ќе потпише нов договор со клубот во кој е цели 20 години. Поради тоа Нејмар изразил желба да се врати во Барселона и повторно да заигра заедно со Меси, а Лапорта нема ништо против оваа идеја.

Мбапе ги шокира челниците на ПСЖ, ја соопшти конечната одлука и тоа не е единствена бомба која ја подготвува Реал