Рускиот претседател Владимир Путин изјави денеска дека засега нема потреба од руско-кинески воен сојуз, но не исклучи таква можност во иднина.

– Нам не ни треба сојузот со Кина, но теоретски е сосема веројатно да се замисли, одговори Путин на прашање за можноста за воен сојуз меѓу Москва и Пекинг, за време на видео-конференција со меѓународни експерти за надворешна политика.

Изјавата на Путин укажува на продлабочување на врските меѓу Москва и Пекинг, во време на растечки тензии во односите меѓу двете сили и САД.

Русија и Кина развија „стратешко партнерство”, но досега ја исклучија можноста за формирање воен сојуз.

Путин потсети на заедничките воени вежби на Русија и Кина, и додаде дека Москва споделува воени технологии што значително придонеле за зајакнување на кинескиот воен потенцијал.