НБА: Мајами намали во финалето против Лејкерси (ВИДЕО)
Кошаркарите на Мајами хит ја совладаа екипата на Лос Анџелес лејкерс со 112:102 во третиот меч од НБА финалето. „Жешките“ го намалија резултатот во финалето на 2:1 и тоа без Адебајо и Драгиќ, кои се повредени.
„Жешките“ беа предводени од феноменалниот Батлер кој натпреварот го заврши со „трипл-дабл“ учинок од 40 поени, 11 скока и 13 асистенции (70% од поле). Олиник и Хиро додадоа со по 17 поени, 13 имаше Робинсон, а 12 Краудер.
На спротивната страна за „езерџиите“ Џејмс реализираше 25 поени, 10 скока, осум асистенции, но и дури осум загубени топки, од кои три во многу важни моменти од дуелот.
Дејвис постигна 15 поени (пет скока), долг период беше без шут, а потоа направи релативно брзо четири фаули. Поефикасни од него беа Кузма и Морис кои забележаа по 19 коша.
Останува да се види дали Мајами ќе може да смета на услугите на Драгиќ и Адебајо во четвртиот меч, кој е на програмата во ноќта помеѓу вторник и среда од 03.00 часот по македонско време.