НБА играчите во проблеми: Им се намалуваат или укинуваат платите
На кошаркарите во НБА лигата ќе им бидат исплатени платите според предвиденото во април, но примањата потоа се под голем знак прашалник, јавува влијателниот новинар на ЕСПН, Адријан Војнаровски.
Причина за ова е суспензијата на НБА лигата поради пандемијата на коронавирусот. Поради тоа не се исклучува да дојде до намалување на платите или целосно запирање на исплатата, а челниците на НБА лигата веќе испрати меморандум до сите екипи.
Според извештаите, ваков потег е дозволен поради клаузулата од колективниот договор. Не него се наведува дека на играчите е можно да им се намалат платите во катастрофални состојби какви што се војна, природни катастрофи или епидемија.
Комесарот на НБА лигата, Адам Силвер, на 11. март ја стави лигата во „карантин“ откако тестовите покажаа дека центарот на Јута, Руди Гобер е позитивен на коронавирусот. Силвер тогаш објави дека лигата е суспендирана најмалку 30 дена, но доколку се влоши состојбата со пандемијата на коронавирусот, тогаш е можно паузата да трае многу подолго.