Профилот на рускиот претседател Владимир Путин од разузнавачката служба КГБ сега е достапен за јавноста, во големата декласификација на документи од централната архива во Санкт Петербург, објави руски „Москва тајмс“.

Путин, кој служел како шпион на Советскиоит сојуз меѓу 1975 и 1991 година, му даваше големо значење на КГБ за подготовката на неговото претседателство на Русија. Тој ја презема лидерската позиција на земјата во 2000 година, откако кратко ја водеше наследничката на КГБ, разузнавачката ФСБ.

– Другарот В.В. Путин константно ги подобрува неговите идеолошки и политички стандарди. Тој активно е вклучен во мрежата на едукација на партијата. Тој исто така ги подобрува и неговите професионални вештини – пишува во профилот.

Профилот на шест страни за Путин, објавен од телевизијата 78 њуз од Санкт Петербург, ја нагласува неговата „морална стабилност“ и „заслужено заработениот авторитет кој го добива од неговите колеги“.

Рускиот претседател бил стациониран во Источна Германија во 1985 година, откако го завршил неговото високо образованиот во московскиот огранок на училиштето на КГБ. Во 1989 година, тој добил бронзен медал за „извонредна“ работа во Народната армија на Источна Германија.