Фудбалерите на Милан и Њукасл од 18.45 часот на стадионот „Сан Сиро“ ќе го играат натпреварот од првото коло од групната фаза на Лигата на шампионите.

За навивачите на Њукасл ова е како нов „празник“ со оглед дека нивниот клуб по долго време се враќа на европска сцена.

Сепак, некои од нив нема да го паметат со задоволство гостувањето во Милано, а меѓу нив е и еден 58-годишен навивач на Њукасл кој заврши во болница, пренесува „Дејли Мејл“.

Имено, тој беше избоден ноќта пред натпреварот во Милано, по тепачка со навивачи на италијанскиот клуб и со повредите заврши во болница. Навивачот на Њукасл, беше излезен со пријател, кога биле нападнати од група од седум-осум навивачи на италијанскиот клуб.

Како што е потврдено, тој се здобил со повреди на рацете и грбот, откако бил избоден додека бил на земја, каде што завршил во обидот да побегне од напаѓачот.