За прв пат, нутриционистите успееја да потврдат дека има поврзаност помеѓу одредена храна и квалитетот на спермата, во овој случај – бадеми, лешници и ореви. Квалитетот на спермата зависи од многу фактори, не само од генетиката, туку и од природната средина, начинот на живот и, особено, исхраната, чија важност научниците неодамна ја потврдија, пишува „New York Post“.

Резултатите покажаа дека мажите кои јадат по принципот на т.н. западни диети, кои се богати со црвено месо, индустриски производи и шеќер, веднаш по вклучувањето на јаткасти плодови во исхраната го подобруваат генетскиот профил на сперматозоидите.

Новото истражување се заснова на претходни откритија кои укажуваат на подобрувањето на вкупниот квалитет на сперматозоидите, вклучително и подвижноста и бројот на сперматозоиди кај мажите кои редновно јадат јаткасти плодови.

Сепак, истражувачите од Универзитетот во Јута и Шпанскиот Универзитет Ровира и Виргил во Тарагона, отидоа чекор подалеку испитувајќи ги молекуларните процеси односно метилацијата, кои потврдија дека при зголемен внес на ореви, лешници и бадеми доаѓа до промена на квалитетот на спермата за релативно краток временски период.

Нивното клиничко испитување на случаен примерок вклучувало група од 72 здрави помлади мажи. Од 48 од нив било побарано во нивната исхрана да вклучат по 60 грама јаткасти плодови на ден во период од 14 недели, додека на останатите 24 испитаници им кажале да си продолжат со вообичаената исхрана.

На крајот на експерименталниот период, кај испитаниците кои биле на исхрана збогатена со бадеми, лешници и ореви, биле идентификувани 36 геномски региони во нивниот ДНК примерок на сперматозоиди кои биле „значително диференцијално метилирани“ во споредна со контролната група. Од тие 36 региони, во 97,2% од примероците било откриено дека станале „хиперметилирани“.

Оваа студија е првиот цврст доказ дека грицкањето јаткасти плодови има непосредна корист за многу мажи.

„Ова истражување покажува дека постојат некои чувствителни региони на епигеномот на сперматозоидите кои реагираат на исхраната и може да резултира со промени во спермата и нејзината способност да оплоди“, изјави главниот автор на студијата Алберт Салас-Хуетос.