Научниците од јапонскиот Универзитет „Кјото“ спроведоа студија во која ја тестираа издржливоста на вирусот САРС-КоВ-2 (SARS-CoV-2) и вирусот на инфлуенца А (ИАВ) (А (IAV) во мешавина на слузта на горните дишни патишта и на човечката кожа. Тие исто така ја тестирале ефикасноста на дезинфекцијата од 80-процентен етанол против тие два вируса.

Јапонските научници во студијата откриле дека и двата вируса значително помалку се задржуваат на површината на кожата отколку на другите неоргански површини (како метал, пластика, стакло), но важно е да се напомене дека новиот коронавирус може да преживее на кожата значително подолго од ИАВ.

Откриле дека вирусот САРС-КоВ-2 на кожата преживува дури 9,04 часа, додека ИАВ на човечката кожа може да преживее само 1,82 часа во просек.

Студијата покажа и колку долго двата вируса можат да преживеат во слузта на горните дишни патишта. Новиот коронавирус може да преживее и до 11 часа во слузта, додека ИАВ станува неактивен по само 1,69 часа.

Тестирајќи ја ефикасноста на 80-процентниот етанол во неутрализирањето на двата вируса на човечката кожа, студијата покажала дека оваа концентрација на етанол целосно ги оневозможува за само 15 секунди.

Заклучокот на јапонските научници е дека издржливоста на новиот коронавирус на човечката кожа го зголемува ризикот од пренесување на заразата преку контакт и со тоа ја интензивира самата пандемија. Затоа, хигиената на рацете е исклучително важна во спречувањето на ширењето на заразата.