Научници од Универзитетот во Лондон истражуваа зошто менопаузата почнува подоцна кај мажените отколку кај немажените жени и каква улога игра сексуалниот живот во тоа.

Тимот, предводен од Меган Арнот и Рут Мејс, редовно анкетирал 2936 Американки на возраст од 42 до 52 години, кои сè уште не биле во менопауза и во просек имале две деца, за нивната сексуална активност во текот на десет години.

Истовремено се мерени и други фактори како што се нивото на естроген, физичкото и менталното здравје, степенот на образование и телесната тежина, пишува „Живим“.

И галењето има ефект

Жените со редовен сексуален живот, оние кои имале односи барем еднаш неделно, биле 28 проценти помалку погодени од ран почеток на менопаузата во споредба со оние кои уживале со својот партнер помалку од еднаш месечно. Месечниот секс исто така имал ефект. Се покажало дека е сосема неважно која практика е пожелна: со пенетрација или без неа, орален секс или едноставно галење – се чини дека сите видови еротски средби ја одложуваат менопаузата.

Колку повеќе, толку подобро

Според истражувачите, овој ефект се засилува ако жените се препуштаат на страста дури и неколку пати неделно – нивните шанси за влегување во менопауза по 52-годишна возраст (просечна возраст утврдена со студијата) се особено високи во овој случај. Односот помеѓу сексуалната фреквенција и времето на менопаузата бил речиси линеарен: колку почести се сексуалните односи, толку подоцна настапува менопаузата.