НАТО испраќа борбени авиони и бродови во Бугарија и на Балтикот за заштита од можен руски напад врз Украина
НАТО денеска соопшти дека испратиле уште борбени авиони и бродови во источна Европа, додека Русија продолжува да трупа војска на границата со Украина. Од алијансата велат дека со ова го засилуваат своето присуство во областа на Балтичкото Море. Според нив, уште неколку членки на НАТО понудиле свои војници и опреми.
Шпанија соопшти дека ќе ја засили поморската моќ на НАТО со уште бродови и дека размислува да испрати борбени авиони во Бугарија. Данска ќе испрати фрегата во Балтичкото Море и ќе распореди воени авиони „Ф-16“ во Литванија.
„И Франција е подготвена да испрати војска во Бугарија. Ќе продолжиме да ги преземаме сите неопходни мерки за да ги заштитиме и одбраниме нашите сојузници“, изјави генералниот секретар на НАТО, Јенс Столтенберг.
Велика Британија го следеше примерот на САД и почна да повлекува дел од персоналот во својата амбасада во Киев, откако Вашингтон предупреди дека руска инвазија би можела да почне во секој момент. Русија постојано негира дека планира да ја нападне Украина, иако распореди 100.000 војници покрај границата.
„Сите членки на Европската Унија се обединети. Покажуваме досега невидено единство околу ситуацијата со Украина, во силна координација со САД“, изјави шефот на надворешната политика на ЕУ, Хосеп Борел, додавајќи дека засега не го повлекуваат својот персонал од Киев.