Наташа Малинкова: Најважно е кожата да биде добро хидрирана
Консумирањето вода е многу важно за негуван изглед на кожа, вели нашата поп пејачка Наташа Малинкова.
Поп пејачката со атрактивен изглед, Наташа Малинкова, е една од најактивните наши естрадни ѕвезди кога се во прашање настапите. Таа е и мајка и сопруга, домаќинка која ужива да готви, а тоа, како што вели, си бара и енергија и кондиција. Секако, настапите се напорни и исцрпувачки, бараат многу концентрација. Но Наташа и дополнително вежба и пешачи за фит-изглед.
Еве како се негува, ама пред сè, потенцира дека водата е многу важна за негуван изглед на кожата.
– Негата на лицето и на кожата на целото тело, за мене, е еден од најважните ритуали и го практикувам секојдневно. Имам нормална кон сува кожа и затоа редовно правам професионални третмани и се консултирам со мојот козметолог. Најважно ми е кожата да биде добро хидрирана. Практикувам професионални третмани со пилинг, редовни масажи, ампули со кислород, маски од алги и маски богати со витамини соодветни за мојот тип на кожа. Редовно правам лимфна дренажа на тело со „ел-пи-џи“ третманот, кавитација и детоксикација со третман со алги. За нега на лице пак, користам третмани со криотерапија, козметички третмани со апарати со висока фреквенција, кислородни третмани, микродермоабразија и хидратретмани на лице.
На исхраната не внимавам, но не јадам слатки, вели Малинкова.
Дел од нејзиното мени се тестенините, житарките, зеленчукот, месото и домашно подготвената храна.