Наследничка на „царство за чевли“: Запознајте ја Ана Каспрзак, една од најмладите милијардерки во светот
Ана Каспрзак има само 29 години, милиони на сметката и милијарди што ја чекаат како наследство. Таа е наследничка на царството за обувки „ECCO“, а дури и без семејното богатство спаѓа во најимотните, со сопствена „нето вредност“, според Форбс, од 1,1 милијарди долари. Компанијата „ECCO“ денес работи во 99 земји и вработува повеќе од 20.000 луѓе.
Нејзиниот дедо Карл Тусбај во 1963 година го основал популарниот бренд за чевли, а како млад бил и менаџер во фабриката за обувки во Копенхаген. Пред започнувањето на сопствениот бизнис, Карл и неговата сопруга Бирт објавиле оглас во локалните весници со прашањето: Кој нè сака?, за да привлечат бизнис-партнери и вложувачи, во што и успеале.
Ана е партнер во семејната компанија заедно со нејзината мајка Хана Тусбај Каспрзак и братот Андрео, но водењето на бизнисот не ѝ е целодневна преокупација.
Професионална јавачка
Богатата наследничка е професионална јавачка и олимписки спортист, која се натпреварува во дисциплината на дресурно јавање, каде што целта на јавачите е да истренираат коњот да реагира на суптилни заповеди.
Таа е дел од данскиот национален тим со кој патува на интернационални натпревари, а спроведува и сопствена дресура на коњи. Ана има ќерка родена пролетта 2018 година, но својот приватен живот сака да го држи подалеку од медиумите, со кои единствено сака да зборува за коњи и за чевли.