Во напната атмосфера, со свирежи и извици „Татари, Татари“, околу петстотини охриѓани денеска го изразуваат револтот заради отварањето на бугарскиот клуб „Цар Борис Трети“ во центарот на Охрид.

Протестантите истакнаа транспаренти со натписи „Со фашисти не сме исти, ние сме Македонисти“, „Стоп за холокаустотот против Македонците“, „Европо, практикувај го она што го проповедаш, без дополнителни услови за Македонците, стоп за дискриминацијата“. Тие велат дека не им пречи отварањето на бугарски клуб, туку неговото име.

Пред трговскиот центар Амам граѓаните се дофрлуваа со македонските Бугари кои ги гледаа од терасата. Во еден момент протестантите се обидоа да го пробијат полицискиот кордон, но безуспешно.

Пред клубот пак, се развеани бугарското и македонското државно знаме, како и знаме со ликот на царот Борис.

Отварањето на овој клуб во Охрид предизвика силни осуди во јавноста, а Еврејската заедница во Македонија до ОЈО Охрид поднесе кривична пријава.
Протестот го организира партијата Левица, а вчера и ВМРО-ДПМНЕ го поодржа, со повик да биде масовен, но мирен и достоинствен.