Владата на РСМ одбива партиски ултиматуми кои имаат за цел да го блокираат напредокот на земјата, следуваат чекори што ќе ја обезбедат правната држава и напредокот на патот кон ЕУ, се вели во соопштението испратено до медиумите.

„Владата на Република Северна Македонија информира дека не се создадени услови за постигнување консензус за организирање на лидерската средба закажана за денеска и дека таа нема да се одржи. Владата одбива да прифаќа ултиматуми од неодговорниот партиски претседател на ВМРО-ДПМНЕ кој заштитата на криминалот и заложбата за блокади и изолации ги става пред државните интереси за напредок на нашата земја“, потенцираат ид Владата.

Оттаму потсетуваат дека премиерот Зоран Заев на 15 јули на отворен настан, а потоа и со покани, ги повикал претседателите на ВМРО-ДПМНЕ, ДУИ и на Алијансата за Албанците, на лидерска средба со, како што велат, единствена цел да се обедини придонесот во заокружувањето на реформските процеси во правосудството, изборниот законик, како и за спроведување на пописот, како теми од посебно значење за граѓаните и за нашата земја во пресрет на европските интеграции и одлуката за почеток на преговорите за членство во унијата.

„За жал, претседателот на ВМРО-ДПМНЕ Христијан Мицкоски, наместо да прифати принципиелен разговор и договор за нов Изборен законик, избра да застане на спротивна страна на интересите на граѓаните, на спротивна страна на интересот на државата и побегна од разговорите. Овие клучни теми за продолжување на реформите и економскиот развој на земјата Мицкоски ги деградира со алиби барања кои произлегуваат единствено и само во интерес на теснопартиското профитирање. Тој одби да види дека лидерската средба е можност до следните избори да се обезбеди легислатива прифатливa за сите, со вградени препораки од ОДИХР и со можност да се отвори дебата и за нов изборен модел. Тоа укажува дека целта не била да се разговара за предвремени избори туку да се побегне и од оваа тема“, се наведува во соопштението од Владата.

Во однос на Мицкоски и натаму останува на позициите да го брани криминалот на неговите претходници и политички ментори.

Заев денеска во 14 часот во медиа центарот ќе одржи прес-конференција за следните чекори.