Најтрофејниот фудбалер на сите времиња би можел повторно да игра за Барса
Славниот бразилски фудбалер би можел да се врати во клубот во кој ги имаше најдобрите партии во својата професионална кариера.
38-годишниот Дани Алвеш нема клуб по разделбата со Сао Паоло пред неколку недели, но верува дека и натаму може да игра на врвно ниво.
Доколку Барса има потреба, сигурно Алвеш би прифатил и за помала плата да игра за каталонскиот клуб. Од друга страна познато е тоа дека екипата од „Камп Ноу“ е во огромни финансиски проблеми, па секоја понуда од овој вид може да биде детално разгледана. Особено кога доаѓа од клупските легенди.
Играше во Барселона како десен бек, што беше негова примарна улога во поголемиот дел од неговата кариера, но Бразилецот е навистина добар фудбалер. Откако се врати во Бразил, играше и како крило, односно во средниот ред, па Барселона би можела да размисли да го искористи на друга позиција.
– Доколку Барса смета дека сум ѝ потребен, треба само да ме контактира. Мислам дека можам уште да придонесам – рече Алвеш, кој деновиве се одмара во Шпанија.
Останува да се види дали Барселона ќе го одбие човекот кој шест пати беше шампион на Шпанија во нејзиниот дрес, четири пати го освои Кралскиот куп и Суперкупот, трипати ја освои Лигата на шампионите и трипати Европскиот Суперкуп и Светското клупско првенство..