Најстарата Србинка има 114 години: Живее во сиромаштија, а за неа се грижи само едниот син
Ѓурѓа Марковиќ има 114 години и, официјално, е најстарата државјанка на Република Србија, пишува „Мондо“.
Во својот долг живот, таа родила 11 деца и доживеала да има повеќе од 120 потомци. Според пресметките на семејството, баба Ѓурѓа го доживеала раѓањето на своите потомци до петтото колено и таа им е наврбаба на своите најмлади внуци.
Таа веќе шест години живее во постела, а за неа се грижи само нејзиниот најмлад син Мирослав, заедно со сопругата и синовите. Баба Ѓурѓа живее во куќа без вода, без купатило и во прилично лоши животни услови.
„Никако сум. Не можам да живеам, а не можам ни да умрам“, вели баба Ѓурѓа.
Нејзиниот внук Небојша вели дека ѝ носат вода од блискиот извор, со оглед на тоа што нема вода во куќата. Тој би сакал да ѝ даде многу повеќе, но вели дека не може. Куќата е во лоша состојба, може да се урне во секој момент, а еден ѕид е потпрен со дрва за да не падне.
Баба Ѓурѓа е слепа, а освен старост и исцрпеност, нема друга дијагноза. Нејзиниот син Мирослав, кој се грижи за неа, вели дека забележал чудни промени на нејзиното тело.
„Почна да ѝ се менува кожата, да се обновува. Косата ѝ беше бела, а сега е црна. Ѝ израснаа четири нови заби“, вели тој.
На баба Ѓурѓа ѝ е потребна храна, но и пелени за возрасни, средства за хигиена, гардероба, како и пари за подостоинствен живот. Токму затоа нејзиниот син Мирослав упати апел преку српските медиуми за хуманитарна помош.