Најново истражување: Коронавирусот не се пренесува од мајка на бебе преку доење
Мајчиното млеко е безбедно дури и ако мајката е заразена со коронавирус. Вирусот не се пренесува на новороденчето преку доење – покажало најновото истражување спроведено од експерти од Одделот на неонатологија на Универзитетот во Торино.
„Микробиолошките анализи покажаа дека коронавирусот не се пренесува од мајка на бебе преку доење, што е навистина важно откритие“, рече професорот Дејвид Лембо, директор на Универзитетската лабораторија за молекуларна вирусологија на Одделот за клинички и биолошки науки во Торино.
И истражувањето на тимот од Торино открило дека кај мајки кои биле позитивни на Ковид-19 и се придржувале до сите здравствени мерки (носеле маски за лице, одржувале хигиена на рацете и редовно ги дезинфицирале предметите што ги користеле), ниту едно бебе не се заразило од својата мајка.
„Резултатите се охрабрувачки и за мајките и за здравствените работници кои се грижат за здравјето на мајките и децата“, изјави професорот Лембо.
Доењето не треба да се прекине
Истражувањето објавено од италијанските експерти ги поддржува неодамнешните препораки на СЗО кои, дури и со малкуте достапни информации што ги имаа досега имајќи предвид за придобивките од доењето врз имунитетот на детето, ги советува и позитивните мајки на коронавирусот да дојат.
Професорот Лембо посочил дека антивирусното дејство на мајчиното млеко со години се истражува на Универзитетот во Торино, додавајќи дека се откриени и некои од неговите нови активни состојки кои можат да го заштитат новороденчето од вирусни инфекции.