Најлудиот фудбалски трансфер во историјата: Потпиша за ривалот – за алуминиумски голови и мрежи
Неверојатен трансфер во Хрватска.
Кога станува збор за трансферите со хрватските екипи, вообичаено доминира Динамо Загреб кој редовно прави милионски трансфери при продажба на своите фудбалери.
Сепак, деновиве од Хрватска доаѓа и најневеројатниот трансфер, и наместо милионски суми, овој пат веста е дека фудбалер е продаден за три алуминиумски голови.
Станува збор за трансферот на Рене Шариќ, млад фудбалер на Цибалија од Винковци и премина во Рудеш. Трансферот од еден второлигаш во друг го привлече вниманието поради „три алуминиумски голови со мрежи“
Екипата на Цибалија која во последните две децении поголем дел играше во првата хрватска лига, но во сезоната 2018/19 поради финансиски проблеми е исфрлена во третата лига. За иронијата да биде поголема, во Цибалија сметаат дека тие направиле добар трансфер.
– Вистината е дека на Шариќ на лето му истекуваше договорот по што тој ќе беше слободен играч и Цибалија за него немаше да добие никакво обесштетување. На почетокот на зимскиот преоден рок заедно со својот родител и менаџер бараше да добие чисти документи и да си замине без обесштетување. Можеби тоа порано се праваше, но сега во Цибалија не работиме така. Не може играч кој е под договор да побара документи и да ги добие без да се плати обесштетување. Не сакам да влегувам во детали во приказната која долго време траеше, успеавме да пронајдеме решение со кое Цибалија не остана оштетена, а Рене помина во клуб во кој сакаше да игра. Бидејќи Рудеш не сакаше да плати обесштетување, менаџерот ја презеде одговорноста да набави голови во вредност од 45.000 куни (околу 6.000 евра). Доколку ме прашате мене, ова е одлично обесштетување за играч на кого му завршува договорот за шест месеци – изјави спортскиот директор на клубот, Крешимир Томиќ.