Најдобрите македонски одбојкарки вторпат поразени во Европската сребрена лига
Денеска во својот втор натпревар од групата „А“ во Европската сребрена лига македонската женска одбојкарска сениорска репрезентација загуби од Летонија со 0:3.
Првиот сет во СЦ „Борис Трајковски“ донесе најголема неизвесност, одбојкарките на селекторот Стефан Пауновиќ еднаш водеа минимално на стартот од мечот со 4:3, потоа трипати доаѓаа до израмнување (7:7, 8:8, 9:9).
Резултатски нашите најдобри одбојкарки се држеа до негатива од 18:19, а потоа следуваше низа од пет поени на противникот за 18:23. Успеа македонската селекција да стигне повторно до минимална негатива (23:24), но Летонките не дозволија целосен пресврт и поведоа со 0:1 во сетови.
Добро го започнавме вториот сет стекнувајќи највисоки „плус три“ позитива (6:3). Следуваше голем пад во нашата игра ѓтп беше казнето од Летонија која направи серија од 8:1 за водство од 7:11. Гостинските одбојкарки успешно ја одржуваа својата предност која постепено растеше, а највисоката изнесуваше на крајот од вториот сет (18:25).
Во третиот сет го имавме само почетното водство од 1:0, по што започна нова доминација на Летонките кои се одвоија на 2:6. Немаа сили македонските одбојкарки повторно слично како во првиот сет да бидат во егал, противникот стигна и до двоцифрена позитива од 11:21 што ги реши сите дилеми околу победникот.
Естонија по втората победа во натпреварувањето над Австрија со 3:0 се првопласирани со шест бодови. Летонките и Австријките имаат по три, а Македонија е последна без бодови. Избраничките на селекторот Пауновиќ следниот меч ќе го имаат повторно во Скопје на 3 јуни против Естонија.