Во 28 години постоење на Премиер лигата настапувале многу играчи од странство и дефинитивно не е лесен изборот да се одвојат најдобрите 11 фудбалери во историјата.

Кога Серхио Агуеро постигна хет-трик во победата на Манчестер сити (6:1) против Астон Вила во текот на изминатиот викенд, се промовираше во најдобриот странски стрелец во историјата на Премиер лигата.

„Сан“ го избра најдобриот странски состав на сите времиња во Премиер лигата, играчи кои не се од Англија.

На голманската позиција е легендарниот Данец Питер Шмајхел, во одбраната се Виржил ван Дајк, холандскиот дефанзивец на Ливерпул, потоа Србинот Немања Видиќ кој имаше значајна улога кај Фергусон, како и Белгиецот Винсен Компани како долгогодишен капитен на Манчестер сити.

Во средниот ред се Французинот Патрик Вјера, кој своевремено блескаше во Арсенал, потоа Шпанецот Давид Силва кој и натаму е член на Сити, па португалската ѕвезда Кристијано Роналдо за кој не треба да се трошат зборови, француската легенда на Јунајтед, Ерик Кантона, и Белгиецот Еден Азар кој беше фантастичен во дресот на Челзи.

Нападот го пополнуваат аргентинскиот интернационалец Серхио Агуеро и уште една француска легенда, екс играчот на Арсенал, Тјери Анри.