Комеморативната академија по повод Меѓународниот ден на сеќавање на холокаустот – 27 јануари, која се одржа во Македонската академија на науките и уметностите (МАНУ), и со која беа одбележани 75 години од ослободувањето на најголемиот нацистички концентрационен логор Аушвиц – Биркенау и 20 години од Стокхолмската декларација, беше проследена со изложба на студентски плакати на тема „Сеќавање на холокаустот – никогаш и никому да не се повтори“.

Студенти од повеќе универзитети во државата на темата одговорија со 50-ина плакати, а комисија составена од претставници на МАНУ, МНР, ФХЕМ, УКИМ, Европски универзитет, ФОН и универзитет „Визион“ додели пет награди во три категории. Првото место го освои Снежана Давиткова (Факултет за арт и дизајн, Европски универзитет Скопје), второто место му припадна на Владимир Милиќ (Факултет за ликовни уметности, УКИМ), додека третото место го поделија Наум Секуловски (Факултет за арт и дизајн, Европски универзитет Скопје), Наташа Егуменовска (Факултет за дизајн и мултимедија, отсек графички дизајн, ФОН) и Ветон Арифи (Факултет за арт и дизајн, Европски универзитет Скопје). Графичките решенија на студентите се сеќавање на сите жртви на холокаустот, меѓу нив и на 7.144 Евреи од Скопје, Битола и Штип, кои во март и април 1943 година беа депортирани и убиени во логорот на смртта Треблинка.

Изложбата беше организирана од МАНУ, Министерството за надворешни работи и Меморијалниот центар на холокаустот на Евреите од Македонија.

(Текстот е објавен во „Културен печат“ бр. 16, во печатеното издание на „Слободен печат“ на 1-2 февруари 2020)