Првата награда на третиот годишен конкурс за стрип „Лифт“ за 2020 година на издавачката куќа „Темплум“ ја доби авторката Евгенија Трајковска со стрипот „Назад во 2019-та“. На конкурсот пристигнале петнаесет стрипа од 17 автор(к)и, а графичката приказна на Трајковска се издвоила од сите други и во нејзиниот случај жирито, во состав Никола Гелевски, Јана Јакимовска и Владимир Битољану, имало сосема унисони ставови.

Според жирито, „Назад во 2019-та“ е најкомплетен стрип меѓу пристигнатите, дело со динамична и духовита приказна, како и со одличен цртеж, а нагласени се и неговата релевантност и актуелност. Околу другите награди работата не била толку едноставна, така што второто место го делат три стрипа: „Можност“ на Климентина Соколовска, „Воена песна“ на Анастасија Зафировска и „Promise“ на Иван Коминовски. Меѓу најдобрите се издвоиле уште три стрипа, кои за нијанса не добиле награди: „Зошто јас, Јан?!“ од Христијан Нашуловски, „Издржи“ од Кристина Ѓорѓиоска и „Она девојче онаму“ од Ева Дејановска.

Прворангираната авторка ќе добие книги и стрипови во противвредност од 250 евра. Другите тројца автор(к)и ќе ја поделат предвидената сума за второто и третото место – вкупно 250 евра. Наградниот фонд, во висина од 500 евра, го обезбедија издавачите „Темплум“ и „Бункер“.

По завршувањето на третиот конкурс, од „Темплум“ истакнаа дека ги радува фактот што на конкурсот учествувале неколку талентирани адолесцент(к)и и што доминацијата ја имаат авторките (учествувале 13 авторки и само 4 автори) во медиум што до неодамна се сметаше, речиси, исклучиво за машки.

(Текстот е објавен во „Културен печат“ број 66, во печатеното издание на „Слободен печат“ на 30-31 јануари 2021)