Лајпциг во вторник (21.00 часот) на неутрален терен поради коронавирусот ќе биде домаќин во Будимпешта во првиот натпревар од осминафиналето во Лигата на шампионите против Ливерпул.

Клубот од „Енфилд“ ги загуби последните три натпревари во Премиер лигата, додека Лајпциг славеше на последните четири мечеви во сите натпреварувања, примајќи само еден гол. Тренерот на бундеслигашот, Јулијан Нагелсман и покрај таквиот податок, доволно е свесен за тежината на предизвикот.

– Резултатите во Премиер лигата не се сметаат во Лигата на шампионите. Можеби тие веќе се „откажаа“ од титулата во Англија и ќе влезат во Лигата на шампионите со полна сила. Кога ги слушате менаџерите од Премиер лигата, сите велат дека Ливерпул и покрај кризата е најтежок противник покрај Манчестер сити. Ливерпул е благ фаворит врз основа на искуството во меѓународните натпреварувања, но ние покажавме минатата сезона и оваа дека можеме да се справиме со такви клубови. Ние се развивме како тим – рече Нагелсман.

Лајпциг ќе биде домаќин во унгарскиот главен град, бидејќи Германија забрани патување од земјите каде што е забележано зголемување на заразата од новиот сој на коронавирус, вклучувајќи ја и Велика Британија.

– Доколку загубиме, тоа нема да биде заради стадионот, туку заради начинот на кој сме играле. Ние сме во добра серија и со добар дефанзивен перформанс на целиот тим, можеме да бидеме рамноправни со Ливерпул – додаде стратегот на Лајпциг.

Куман: Мора да живееме со проблемите, ќе биде интересно со ПСЖ!