Голем успех во својата млада тренерска кариера направи Јулијан Нагелсман, го однесе Лајпциг во полуфиналето од Лигата на шампионите, а има само 33 години.

Во осминафиналето го исфрли Тотенхем на Жозе Мурињо, а вчера во четвртфиналето и Атлетико Мадрид на Диего Симеоне. Нагелсман е фудбалски гениј каков што ретко се раѓа, поради што доби и прекар „Мини-Мурињо“.

На 28-годишна возраст го имаше првиот договор со бундеслигашот Хофенхајм, и оттогаш само реди успеси и се развива како тренер. Лајпциг му дојде како надградба и логичен исчекор во неговата кариера, а тој не чекаше долго да го однесе тимот на два натпревари од освојувањето на највредниот пехар.

Интересно е што Нагелсман е помлад од неколку најголеми фудбалски ѕвезди во светот како Роналдо, Меси, Суарез, Варди, Пике…

Julian Nagelsmann is younger than:

Lionel Messi
Cristiano Ronaldo
Thiago Silva
Luis Suarez
Gerard Pique
Dries Mertens
Jamie Vardy
Sergio Ramos
Manuel Never
David Luiz
João Moutinho
James Milner

He's managing in a Champions League semi-final.#Club2020 pic.twitter.com/u2k20UIF8w

— Football on BT Sport #Club2020 (@btsportfootball) August 13, 2020

Нагелсман е првиот тренер кој го елиминираше Симеоне во нокаут-фазата на ЛШ без Кристијано Роналдо во тимот. Симеоне до синоќа испаѓаше само од Реал Мадрид и Јувентус кои беа предводени од Роналдо.

Младиот тренер на 31 година ја одби понудата да седне на тренерската клупа на Реал Мадрид.

– Нормално кога ве повикува клуб како Реал, добро размислувате околу тоа. Во првите моменти бев изненаден, но не чувствував дека тоа е добар пат. Сакав да напредувам како тренер, а во Реал нема време за такво нешто. Немате можност да бидете подобар стратег, бидејќи морате да бидете веќе најдобар. Јас тоа не сум, иако можам да признам дека во иднина сакам да бидам најдобар.

Доколку одите во Реал Мадрид или Барселона, навивачите, медиумите и управата вам не ви оставаат време, туку само се бараат победи, титули…Доколку не победите, не можете да кажете пред јавноста дека сте млади и дека и натаму се развивате како тренер – беа тогашните зборови на Нагелсман по добиената понуда од Реал.

Нема многу време за одмор во Лигата на шампионите, неговите „бикови“ за четири дена ќе го играат полуфиналниот натпревар против ПСЖ на стадионот „Да Луж“ во Лисабон.