Роже Федерер, Рафаел Надал и Новак Ѓоковиќ доминираат во светскиот тенис повеќе од 15 години. Големата тројка на тенисот од Вимблдон 2003 година, досега победи на 53 од вкупно 64 гран слем турнири. И тројцата се пласираа во осминафиналето на Вимблдон и се најголеми фаворити за освојување на трофејот со што би ја продолжиле победничката серија.

Федерер е рекордер со 20 освоени гран слем турнир, во чекор го следи Надал кој има 18, додека Ѓоковиќ во своите витрини има 15 гран слем титули. Најблиску до големата тројка од активните тенисери се Станислас Вавринка и Енди Мареј со по три титули од најголемите турнири.

– Не знам кој може да го прекине нашиот победнички низ. Веројатно некој добар тенисер, а ги има неколку. Некои се многу млади тенисери и им е потребно време. Но, навистина не знам, не ми е лесно да одговорам на ова прашање бидејќи и јас сум дел од сево ова. Искрено тоа што ние тројца го постигнавме на гран слем турнирите и во тенисот воопшто во последните 15 години е нешто навистина посебно. Да се има во ист момент дури тројца тенисери кои постигнале толку многу успеси е неверојатно, и мислам дека тешко ќе се повтори. Ние и понатаму сме на турнирите, нормално дека некој ќе не победи или ќе се повлечеме бидејќи не сме повеќе млади – изјави Надал.