Надал ќе биде без тренер на Австралија Опен
Вториот тенисер на АТП ранг листата на претстојниот грен слем турнир покрај себе нема да го има тренерот Карлос Моја.
Причина за тоа е пандемијата на коронавирусот, Моја на социјалните мрежи откри дека по разговорот со Надал одлучил да не патува за Мелбурн.
„Ќе го следам турнирот од дома и ќе останам со семејството, родителите и децата поради сложената ситуација со коронавирусот во Шпанија“, објави Моја.
Без тренер во Австралија може да остане и третиот тенисер на АТП ранг листата, Доминик Тим, бидејќи Николас Масу е позитивен на коронавирус.
– Пред заминувањето за Австралија сме известени дека Масу е позитивен на коронавирус. Ќе се тестира повторно за неколку денови и се надеваме дека вториот тест ќе биде негативен по што ќе може да ни се придружи подоцна – изјави таткото на Доминик, Волфганг Тим.
Стартот на Австралија Опен е закажан за 8. февруари и ќе трае до 21. февруари, а поради рестрикциите поврзани со коронавирус, сите учесници мора да поминат 14. дена во карантин по пристигнувањето во Австралија. За влез во Австралија потребен им е негативен тест на коронавирус, а за време на двонеделниот карантин сите ќе бидат тестирани неколку пати.