Поранешниот колега од шпанската тениска репрезентација, Давид Ферер, изјави дека Надал во наредната година ќе има поинакви приоритети во однос на досегашните.

– Рафа ќе се обиде да освои што повеќе грен слем титули. Тоа е неговата главна цел. Сака уште долго време да биде конкурентен, исто како и Федерер и поради тоа ќе намали со настапите на турнирите. Засега е на првото место на АТП ранг листата и ситуацијата за него е добра – вели Ферер.

Ферер, кој годинава замина во пензија, смета дека во 2020 година, неколку млади тенисери ќе се обидат да ја симнат од тронот големата тројка, Надал, Новак Ѓоковиќ и Роже Федерер.

– Циципас, Тим и Медведев се многу добри тенисери и очекувам идната година да бидат уште подобри и да ја нападнат големата тројка на грен слем турнирите. Сепак, сметам дека Надал има најголеми шанси и идната година да заврши на првото место – рече Ферер.