Казни за 437 неправилно паркирани возила само за септември, вкупно 2.421 возило во деветте месеци од 2019 година, покажува статистиката на тетовската полиција. Само вчера поради паркирање на несоодветни места биле казнети 23 возачи.

– Секторот за внатрешни работи Тетово продолжува со континуирани активности за поголем ред со паркирањето во Тетово. Повторно апелираме до возачите да не ги паркираат возилата непрописно, особено не на пешачки премини, во зеленило, во зони на крстосници, на тротоари или во таканаречни двојни редови. Ова, посебно се однесува на погрешно паркирање во близина на училишни и други јавни објекти, а поради секојдневно присутна зголемена фреквенција, изјави портпаролот на СВР Тетово, Марјан Јосифоски.

Од јавното претријатие „Градски паркинг” информираат дека во септември се евидентирани 212 случаи на возила подигнати од пајак службата врз основа на непрописно паркирање или неплатено зонско паркирање.