Танц фест Скопје ќе ја заврши сезоната за 2021 година со настап на „Скапино балет“ од Ротердам и Скопје танцовиот театар на 9 декември во МНТ, а во чест на долгогодишната соработка со холандски уметници и создавање на современата танцова сцена кај нас.

На програмата се перформансите „Везул“ и „Резонанца“ со кореографија на Ед Вуб на „Скапино балет“, танцовиот филм „Јантра“ според кореографија на Шајлеш Бахоран и претставата „Меѓусвет (Убавите жени)“ на Скопје танцовиот театар во кореографија и режија на Рисима Рисимкин.

„Скапино балет Ротердам“ е една од најзначајните современи танцови компании на холандската и светската танцова сцена, која прославува 75 години од своето основање. Тоа е најстарата танцова компанија во Холандија, која низ годините донесе смел, експериментален и современ сценски израз и стана креатор на вкусот на холандскиот танц.

На настанот ќе биде доделена наградата „Менада“ за поддршка на развојот на современиот танц во Северна Македонија на амбасадорот Дирк Јан Коп.

(Текстот е објавен во „Културен печат“ број 108, во печатеното издание на весникот „Слободен печат“ на 4-5 декември 2021)