На секои 15 минути возило од погребалното претпријатие застанува пред крематориумот на мадридските гробишта Ла Алмудена, а отец Едуар излегува од капелата да ги поздрави членовите на семејството кои дошле да се простат од починатите, пишува Си Ен Ен.

Од почеток до крај, целиот процес трае само пет минути. Свештеникот го попрскува ковчегот со света водичка, по што се појавуваат две лица од персоналот, го ставаат ковчегот на количка и го уфрлуваат во печката од крематорумот. И тоа е се. Нема говор, посети, ниту јавен погреб. Тешко дека има време за збогување, наведува Си Ен Ен.

Како што заминува едно возило од погребалното, се појавува друго.

Ова е вообичаена глетка дури и за едно од најголемите гробишта во Западна Европа, чии споменции сведочат за периодите на глад, граѓанска војна и шпанската треска. Но, погребите сега исто изгледаат, во земјата во која има вонредна состојба поради здравствената криза.

Луѓето се во болка не само затоа што ги загубиле драгите лица, туку и што не можат да ги испратат како што доликува. Некои од нив ја пренесуваат во живо преку своите мобилни телефони, службата до својата поширока фамилија и пријателите, но тоа секако не е последно збогување какво што посакувале покојните.

– Дојдов сам. Мојот брат и сестра не можеа да дојдат. Мојата жена не дојде. Внуците не дојдоа. Само јас. Никогаш не сум помислил дека крајот може ваков да биде – вели за Си Ен Ен Феликс Поведа, кој дошол да ја испрати својата мајка, и додава дека планира вистински погреб кога ќе заврши здравствената криза, иако не е сигурен кога ќе биде тоа.

Црквите се затворени ширум Шпанија, а овие гробишта се едни од неколкуте места на кои мнозинската католичка популација и натаму може лично да види свештеник.

– Се обидувам да им е приближам. Им зборувам дека сум со нив и дека не се сами. Понекогаш тоа ме вознемирува. Плачам – вели отец Едуар.

– Можеби звучи малку чудно, но во овој историски момент тоа го сметам за привилегија – мојот живот е за луѓето, да бидам со нив во овој клучен момент, вели свештеникот.

Шпанија е најмногу погодена од пандемијата со Ковид -19 од другите европски земји и второ жариште по Италија. Мадрид е во епицентарот на епидемијата и се смета дека дури 40 отсто од вкупно смртните случаи се од коронавирусот.

Градските мртовечници не можат да го испратат бројот на тие случаи, па две лизгалишта привремено се користат за сместување на телата. Од градските гробишта наведуваат дека кремираат два-три пати повеќе тела од вообичаеното.