На ПСЖ му здосадија игрите на Мауро и Ванда, си најде нов екстра напаѓач во Англија
Францускиот шампион започна преговори со Арсенал за трансфер на Пјер Емерик Обамејанг.
Фудбалската вест на денот доаѓа од Англија каде Арсенал започна преговори со ПСЖ за продажба на капитенот Пјер-Емерик Обамејанг.
Имено, Обамејанг ги извести „топчиите“ дека нема намера да потпише нов договор и побара од управата да биде ставен на трансфер листата бидејќи сака во наредната сезона да игра во Лигата на шампионите.
Од друга страна, на директорот на ПСЖ, Леонардо, му здосадија игрите на Маури Икарди и на неговата сопруга и агент, Ванда Нара, и планира по секоја цена да го реализира трансферот на Обамејанг.
Леонардо е подготвен на Арсенал да му понуди 40 милиони евра плус дополнителни бонуси од 10 милиони евра. Оваа сума е прифатлива за Арсенал, додека одличниот напаѓач ќе може да смета на годишна плата од 12 милиони евра.
Доколку се реализира овој трансфер, најголем губитник ќе биде Интер бидејќи ќе остане без планираните 70 милиони евра обесштетување од продажбата на Икарди, а исто така и без Обамејанг кого планираше да го купи со парите од трансферот на Аргентинецот.