Жителите на општина Кисела Вода наскоро ќе можат бесплатно да се ослободат од стариот и непотребен мебел од своите домови. Општина во периодот од 2-ри до 13-ти октомври ќе спроведе нова акција за бесплатно собирање на кабастиот отпад.

 Во рамките на сите месни и урбани заедници на општина Кисела Вода ќе бидат ангажирани одговорни лица и сезонски работници кои секојдневно бесплатно ќе го подигнуваат кабастиот отпад од пред домаќинствата или колективните згради на територија на општина Кисела Вода. За да се искористи оваа бесплатна услуга, потребно е да се закаже термин на телефонскиот број 02/2785-427 секој работен ден од 09 до 15 часот во период од 25.09.2023 до 29.09.2023 – информира градоначалникот Орце Ѓорѓиевски.

Граѓаните кои ќе сакаат да им биде подигнат кабастиот отпад треба да го одложат пред нивниот објект на безбедна локација за да не ја загрозат безбедноста на пешаците, велосипедистите и останатите учесници во сообраќајот кои ќе се движат во тој период. Потоа, отпадот ќе биде подигнат на денот што е претходно договорен со службите и ќе се транспортира на локација предвидена за ова намена.