На параолимпиец му е одземен златниот медал поради доцнење
По доцнењето, му беше дозволено на параолимпиецот во Токио да се натпреварува, а потоа судијата утврдил дека нема валидна причина за тоа..
Малезискиот параолимпиец Мухамед Зијад Золкефли во атлетика остана без златен медал на Параолимписките игри во Токио, откако беше дисквалификуван бидејќи не се појави навреме на натпреварот.
Золкефли го освои златниот медал во категоријата Ф20, но потоа му беше одземен затоа што претходно доцнеше на натпреварувањето.
Портпаролот на Меѓународниот параолимписки комитет Крег Спенс изјави дека Золкефли и уште двајца натпреварувачи, кои не се освојувачи на медали, доцнеле на натпреварот. Отпрвин, им беше забрането да учествуваат, а по нивниот протест, организаторите им дозволија да се натпреваруваат.
– Доцнеа, можеби имаа логична причина, па им беше дозволено да се натпреваруваат додека не се процени ситуацијата и не се разгледаат сите причини – рече Спенс.
Во соопштението на Светската параатлетика се наведува дека судијата по натпреварот утврдил дека нема оправдана причина за доцнењето и дека нивните жалби за дисквалификација се одбиени. Според новото рангирање, златниот медал го освои Украинецот Максим Ковал, а среброто го освои неговиот сонародник Александар Јаровиј. Бронзениот медал му припадна на Гркот Ефстратиос Николаидис.