На францускиот фудбал му се заканува колапс, пред откажување договорот тежок 814 милиони евра за ТВ правата
Компанијата Медиапро со која Лига 1 има договор до 2024 година не ја уплати ратата за овјо месец од 172 милиони евра и бара сумата да се ревидира со што не се согласуваат челниците на лигата и екипите.
Кризата предизвиката од пандемијата на коронавирусот, полека но сигурно им почнува да создава големи проблеми и во фудбалот.
Француската Лига 1 е прва од најголемите европски лиги кои се соочува со проблеми, односно носителот на ТВ правата, компанијата Медиапро кој има договор до 2024 година кој е тежок 814 милиони евра сака да се промени договорот.
Медиапро се уште ја нема уплатено ратата од 172 милиони евра, а која требаше да ја изврши со петти октомври со што е доведено во прашање функционирањето на Лигата но и егзистенцијата на екипите. Поради тоа челниците на Лигата се одлучија на радикален чекор – ќе позајмат бари од банка.
Станува збор за сума од 120 милиони евра со кои треба да се изгаси пожарот се додека не се реши спорот со Медиапро кој пак е цврст во своите барања да се ревидира договорот и сумата.
Првиот човек на Медиапро, Жом Роур во едно од последните интервјуа изјави дека нивниот интерес не е да се прекине договорот со Лига 1 но тој мора да се преиспита, односно да се намали сумата поради тешката економска ситуација предизвикана од пандемијата на коронавирусот.
Овие негови зборови предизвикуваа бура во фрамцускиот фудбал бидејќи екипите и челниците на лигата не сакаат да слушнат за ревидирање на договорот.
Според медиумите со ваквиот развој на настаните, директно загрозен е францускиот фудбал бидејќи екипите останаа без потребните финансиски средства за да преживеат во овие тешки времиња.