На две недели до изборите во САД: Трамп во офанзива, Бајден во убедливо водство во анкетите
Двајцата кандидати во претседателската трка во САД, републиканецот Доналд Трамп и демократот Џо Бајден, ги интенизивираа кампањитe со митинзи и настапи во пресерт на изборите на 3 ноември. На вчерашните настапи во Невада, Трамп го нападна Бајден со прогноза за „голема депресија” во случај на негова победа.
– Гласањето ќе биде избор меѓу супер оздравување на земјата и депресија на Бајден, изјави Трамп во Лас Вегас.
Тој, исто така, ги оцени претстојното соочување со народот како избор „меѓу сигурни граници и отсусто на граници“, „поддршка за полицијата и стопирање на финансиите за неа“, „меѓу добивање на вакцина во рекордно време за победа над вирусот и затворање на Америка од Бајден за убиство на економијата”.
Трамп, исто така, истакна дека во случај на победа на неговиот ривал, ќе дојде до покачување на даноците и го опиша Бајден како „најдосадниот човек на светот”. Актуалниот претседател викендот одржа митинзи и во Мичиген, во Висконсин и во Калифорнија, на големи собири на отворено, претежно на аеродромски писти, но медиумите прикажуваа слики на толпи луѓе без маски.
Бајден, пак, во саботата беше до домот во неговиот роден Делавер и направи пауза, во неделата беше во црква, а потоа замина на митинг само во Северна Каролина.
Сепак, и покрај активната кампања и обидите да придобие гласови во руралните подрачја на САД , Трамп во анкетите е зад Бајден.
Анкета на „Си-Би-Ес“ укажува дека Бајден води во две клучни држави, во Висконсин со седум проценти и резултат 51 отсто наспроти 41 отсто, држава во која победи во 2016 година. Тој, исто така, води и во традиционално републиканската Аризона (50:47), каде последниот демократ кој таму победил бил Бил Клинтон во 1996 година.
Во меѓувреме, продолжува и предвременото гласање. До вчера, над 27 милиони Американци гласале лично или по пошта, што е рекорд во историјата на САД, покажувајќи колку пандемијата го смени политичкиот пејзаж на земјата и колку избирачите се политички наелектризирани.
Следната дебата меѓу Трамп и Бајден е најавена за в четврток и многумина предупредуваат дека однесувањето на кандидатите на оваа, трета и последна дебата, пред сѐ на актуелниот претседател, ќе придонесе многу во конечниот резултат на изборите.
Порталот „Аксиос“ дозна дека дебатните советници на Трамп му препорачале да не врши такви упади и прекини во говорот на Бајден како на првата дебата и да го остави да зборува.
– Не го спасувај. На Бајден ќе му залута мислата, самиот ќе се препне и ќе започне да мрмори, го советувале Трамп, пренесе „Аксиос“.
Се додава дека советнците му рекле на Трамп „сѐ што треба да направиш е да им дадеш дозвола на луѓето да гласаат за тебе”, како на дебатата со неговата противкандидатка, Хилари Клинтон, во 2016 година.