– Денеска е Светски ден на лицата со хендикеп

1368.- Роден е францускиот крал Шарл VI, кој до својата смрт во 1422 година на престолот бил 42 години. Во почетокот од владеењето бил познат како „Шарл Саканиот“, но бидејќи од 1392 година имал неколку напади на психичко растројство го добил прекарот „Шарл Лудиот“.Во текот на неговото владеење Англичаните во Стогодишната војна, предводени од кралот Хенри V, во 1415 година им нанеле тежок пораз на француските трупи во битката кај Аенкур.

1800.- Во Врба, кај Блед, е роден Франце Прешерн, еден од најголемите словенечки поети. Најзначајно негово дело е „Сонатен венец“. Умрел во Крањ, на 8 август 1849 година.

1857.- Роден е Џозеф Конрад, англиски писател, по потекло Полјак. Најчеста тема на неговите романи и раскази е борбата на човекот со морето. Негови најзначајни дела се романите „Прогонетиот од островот“, „Ностромо“, „Лорд Џим“ и други. Умрел на 3 август 1924 година.

1883.- Роден е австрискиот композитор Антон Фридрих Ернст фон Веберн, еден од најистакнатите експресионисти. Изведувањето на неговата музика беше забрането од нацистите. Создаде специфичен музички јазик со префинети нијанси. Дела: камерна за гудачки квартет – „Пет ставови“, „Шест багатели“, оркестарска – „Шест парчиња“, „Пет парчиња“, „Симфонија за камерен оркестар“, „Варијации, соло песни“.

1894.- Роден е индискиот државник Реџендро Прасад, прв претседател на независна Индија од 1950 до 1963 година.

1894.- Умре шкотскиот писател Роберт Луис Балфур Стивенсон, извонреден стилист. Се обидел во своите дела да го обнови духот на романтиката. Дела: романите – „Остров со богатство“, „Чудните случаи на докторот Џекил и господинот Хајд“, приказните – „Нови приказни од 1001 ноќ“, патописот „Патување со магаре“, есејот „Virginibus puerisque“.

1919.- Умре францускиот сликар Пјер Огист Реноар, еден од најистакнатите импресионисти и еден од најголемите европски сликари во 19. век. Во староста работел и како скулптор.

1923.- Во Њујорк е родена Марија Калас, американска оперска пејачка, сопран, од грчко потекло. Големиот гласовен распон и вонредната сугестивна глума придонесе за нејзината светска слава и да се вброи во најголемите светски пејачки. Умрела во Париз, на 16 септември 1977 година.

1930.- Роден е францускиот режисер Жак Лик Годар, водечка личност во „новиот бран“ француски филмови. Филмови: „До последниот дух“, „Жената е жена“, „Лудиот Пјер“, „Бројот два“, „Да се живее својот живот“, „Карабињери“, „Мажена жена“, „Машко и женско“, „Викенд“, „Еден плус еден“, „Источен ветер“,„Спасувај се кој може“, „Име: Кармен“.

1949.- Умре Елин Пелин (вистинското име му е Димитар Иванов Стојанов), прв оригинален бугарски писател за деца, еден од најдобрите сликари на бугарското село. Најпознати дела му се “Раскази”, “Пижо и Пендо”, “Земја”, “Јас и Ти, Тој”, “Дедовата ракавица”, ” Сказни и раскази”, “Јан Бибијан на Месечината” и други. Роден е во 1877 година.

1967.- Лекарите во Кејптаун, во Јужноафриканската Република, објавија дека во болницата “Гроте Шур”, за првпат во историјата , е извршена успешна трансплантација на човечко срце. Екипата на чело со д-р Кристијан Барнар изврши операција врз заболениот Луис Вашкански, меѓутоа тој умре по десетина дена.

1980.- Во Скопје почина Драги Костовски, познат македонски актер кој на најшироката јавност и е познат по исклучителните остварувања, по многубројните улоги на театарската сцена, на филмот, на телевизијата и во радиодрамската уметност. Роден е во Битола на 22 април 1930 година.

1991.- Русија ја призна независноста на Украина, а рускиот претседател Борис Елцин се заложи за што побрзо нормализирање на меѓудржавните односи на Русија и Украина.

1991.- Во Струмица умре Стојан Гогов, доајен на народниот театар “Антон Панов” од Струмица. Роден е во 1924 година.

1994.- Во Виена умре Франтишек Вацлав Мареш, чешки професор по славистика на Виенскиот универзитет, научник од светски ранг кој има извонредни заслуги за афирмацијата на македонистиката во светот. Тој беше и член надвор од работниот состав на МАНУ.

2013.- Во Скопје почина писателката и публицист Вера Бужаровска. Писателската кариера ја почнала во 1962 година со објавувањето на детската книшка „Стоп“ наменета како забавна и поучна литература за најмладата читателска публика. Следуваат над четириесетина прозни и поетски остварувања, во кои доминираат повести и во чиј центар е жената и нејзината судбина во патријахалното опкружување. Бужароска е родена во Битола на 7 декември 1931 година.

2013.- На 74-годишна возраст почина флејтистот Никола Атанасов. Роден е во 1939 година во Просечани. Во 1964 година завршува Музичка академија во Љубљана, а како стипендист на италијанската влада една година престојува на Академијата Санта Чичилија во Рим на специјализација. Потоа се враќа во Македонија и се вработува како прв флејтист во оперскиот оркестар на МНТ. Добитник е на повеќе стручни награди и државни признанија, меѓу кои „11 Октомври“, „Св. Климент Охридски, „13 Ноември“, „Киро Буровски“ и „Златна лира“.